Kreuze
Ik zal n kwoajong van zo’n joar of twaalf west wezen, toun mie t volgende overkwam, mor ik kin mie t nog goud heugen. t Was op n woensdagmiddag, dus wie wazzen vrij van legere schoule en mit twij kameroaden, Hinderk en Kloas, haar ik ofsproken dat wie vissen goan zollen in t grote Moar. Wie zollen tegen twij uur bie toorn stoan en din doarvandoan op fietse noar t Moar goan. Doar wol t aaltied goud bieten, zeden ze. Toun wie der aal drije waren en controleerd haren of wie wurms en daig genog bie ons haren, gingen wie op pad. Wie mozzen n nuver ìndje fietsen, mor noa n haalf uurtje trappen waren wie der. t Was schier weer, de zunne scheen lekker en wie haren der wel zin in. t Duurde nait laank of de wurms veur de boarskes en de oalen zatten aan t angelhoakje of der zat n kloetje daig aan t hoakje veur de voorntjes. Hou t kwam, wait ik nait, mor op dizze mooie woensdagmiddag wollen de vizzen nait bieten en toun wie noa n dik uur nog steeds niks vongen haren, ging de lol der din ook al gaauw of en duurde t nait laank meer of wie haren t wel zain en de haile boudel wör inpakt.
Vlakbie de plek woar wie zeten haren te vissen ston, aan de overkaante van t wotter, n aarbaidershoeske dat al n tiedje leeg ston. Wie wuzzen dat doar n poar jongens, dij ook bie ons op schoule zaten, woond haren. Der stonnen n stuk of wat bomen bie woar, om dij tied van t joar, proemen aan zaten. Van dij grote lekkere aaierproemen. Ze laagden ons van vèren al tou en hou laanger wie der noar keken, hou groter ze leken en hou meer zin wie derin kregen. Viske raive wör weer mit n endje taauw aan de fietse bonden en wie der hen, op noar de proemen. Wie mozzen n mooi endje terog en din bie n boerderij over n brugge. Toun wie der noa n minuut of tiene fietsen wazzen, gooiden wie de fietsen hen en luipen noar de boom mit de mooiste en dikste proemen.
Hai hing vol, mor ook schuun, zo haalf boven n jirresloot, zo as bomen woar wat lekkers aan hangt dat doun kinnen. Van de aandere kaante van t wotter leek t makkelker om derin te klimmen as nou wie der bie stonnen. Toch duurde t mor even of wie zaten aal drije in boom. Wie deden ons te goud aan dij grote aaierproemen en haren nait in de goaten dat der n stok of wat jongens aan kwamen. Inains heurden wie ze en zagen wie wel of t wazzen: de jongens dij doar in dat hoes woond haren, mit nog n kameroad. t Wazzen n beetje van dij toesterge jongens. Dat kwam denk ik, omdat ze zover achteroet woonden en nait veul onder de minsen kwamen.
“Wat doun ie doar in onze boom?” vruig ain van heur. Wie zeden: “Joe binnen verhoesd, dizze bomen binnen nait meer van joe.” Zo bekvechtten wie nog wat deur en de stemming wur aal minder. “Kom der oet,” zee Job, dij de grootste was, din zellen wie joe n pak haauwe geven.”
Dat leek ons niks, wie wazzen nait van dij vechtersboazen, mor joa, wie mozzen vanzulf wel n keer weer oet de boom. t Duurde nog n zetje en toun sprong Kloas oet de boom. Ze vlogen geliek op hom of en sluigen hom, veurdat hai t in de goaten haar, n bloudneuze. t Was mainens, dat zagen Hinderk en ik nou wel en n bloudneuze of n soepoge doar zaten wie nait op te wachten. Hinderk sprong oet de boom noar de aandere kaant van de sloot en verdold ze deden hom niks. Dat leek mie ook wel wat, ik heurde Kloas nog aal wat snöttern. Bloud luip hom over de kinne op zien boezeroentje. Ik kroop n endje verder de boom in, din kon ik beter springen, docht ik. Toun ik n schier plekje vonnen haar en sprong, vuilde ik dat mien aine voude even achter n takje hoaken bleef. Ik muik mie doar n draai van n kwartslag en kwam op dubbele nek in sloot terecht. De jongens op de wale laggen dubbel van t lagen. Ze sluigen zok recht op de knijen, zo’n lol haren ze toun ze mie zagen. Ik kroop tou sloot oet en rook miezulf. Ik kreeg zo’n vieze jirrelucht in de neuze. Doar was ik mooi kloar mit. Ik ging noar t Moar en sluig mien kop n poar keer deur t wotter, zodat de dikste troep der wat of ging. Dij jongens huvven ons nait meer hebben, dij haren heur lol had. Wie pakten onze fietsen en muiken dat wie weg kwamen. Ze ruipen ons nog wat noa, toun wie al n endje weg waren, mor dat kon ons nait schelen. Op weg noar hoes trapte ik wat haarder deur as mien baaide kameroaden, mor dat vonden ze nait aarg. Toun ik deur t dörp ree, kwam mie der n vraauw tegen mit n lutje wichtje noast zuk op n fietske. t Lutje wicht keek mie aan en zee: “Most ains kieken moeke, dij jong het kreuze boven op kop zitten.” Ik heurde ’t wel, mor kon der nait om lagen.
Vanzulf was mien moeke der nait toun ik toes kwam, dat zelst aaltied zain as der wat biezunders is. Zai was bie de kapper, luit zuk permanent zetten. Ik was nog mor net in schure of mien pa kwam deraan. Hai zee: “Wat zugst der ja oet, woar hest wel in zeten en wat stinkst ja.” Ik vertelde hom wat der gebeurd was. Hai bedocht zuk nait en pakte n grode emmer, luit hom vol lopen mit kòl wotter, pakte n roege bounder en ik mos klaaier oettrekken. Hai begon mie te hemmeln, nait te zuneg. Toun hai kloar was gluide ik aan ale kaanten. n Ketaaier loater kwam mien moeke toes. Ze rook al in schure dat der wat biezunders was (as dat ook nait zo west was, was ze stief verkòllen west) en toun ze mie in keuken op stoule zitten zag en t verhoal heurd haar, begon ze te lagen en ik, ik glom as n ekkel.
n Poar week loater binnen wie doar weer in de buurt aan t vissen west en toun wie t hoes mit de proemebomen stoan zagen, zagen we ook dat aal proemen derof waren. Misschain haren dij jongens toun toch wel geliek had en waren t heur proemen west.
Wie hebben t mor nait meer vroagd.