Ie kinnen der mit lezen en schrieven
Henk Scholte is op 21-2-2025 oet tied komen.
Geboren op 26 juli in Emmen en brocht zien jeugd deur op Knoal. In 1976 sloot hai zok as zanger aan bie de meziekgroep Törf en wur in de loop der joaren de boaskirrel van dizze groep veur volksmeziek. In 1997 kreeg Törf veur heur culturele waark de K. ter Laan pries van Stichting t Grunneger Bouk. Henk Scholte schreef laidteksten en gedichten in t Grunnegs, en zien braide interesse veur Grunninger Cultuur en dialectliteratuur laidde der tou dat hai end 1981 ain van de oprichters van t Grunneger Tiedschrift Krödde was. In 1991 kwam zien bundel Vervrömd, Grunneger gedichten mit omtoalingen in t Oostfrais deur Carl Heinz Dirks. Tot 1995 muik hai dail oet van de redactie.
d Aine noa d andere oetdoagen het Henk Scholte op zien scholders nomen. Hai was o.a as zanger, presentoator, entertainer, verhoalenverteller, acteur en tekstschriever verbonden aan: de musical Northside Story1984, Bloomsday in Stad, t jazz-poetry project De Verhuizing en t openluchtspittoakel De Watergang . In 1989 wur Henk Scholte aansteld as Kulturintendant van d Eems Dollard Regio. t Bevorderen van grensoverschriedende contacten was de braide toak dij hom op t lief schreven leek. Hai was op veul menaaier betrokken bie literaire en culturele projecten en kin sunds 2000 in zien doagliekse Radiopergram “Twij deuntjes veur ain cent” zien oetgebraaide en diepgoande kennis van streektoalmeziek in de klaine toalen van Europa kwiet. In 2002 kreeg Henk Scholte de Wessel Gansfortpries, de twijjoarliekse culturele pries van de pervinzie Grunnen. Op dit mement is hai consulent van t Huis van de Groninger Cultuur.
Zelfstandige publicoaties
1991 Vervrömd (Styx)
Biedroagen aan publicoaties
2003 Wotter, Grunneger dichters (Biblionet Groningen)
2006 De 100 mooiste Groningse gedichten (kleine Uil)
2015 Dast doe dat ik (Huis van de Groninger Cultuur)
2016 Kört bestek – columns (Huis van de Groninger Cultuur)
Mit t koeren van de doeven
Bin k op zuik goan noar die
Hoog boven verglee t bos in de lucht
Op t smale bospad
Wees mie n perebloum
Vol parasjuten de weg
Noar blaauwe Beetster plazze
In de mat rimpelnde spaigelbeelden
Heb k die hou onpaailboar ook
Mit d’ogen dicht toch nog vonden
Dit is gain ofschaaid
Want wie kwammen mekoar nog noeit in de muit
Ook dou over de stroaten
Schare over schare lag
As ainzaalme man op de vlucht
Mörn, nee
Mörn is nait dij aanderkaande van de nacht
Wel verwachtens wekt
Is n dikke boef
Loat t verhoal, dij in de nacht begon
Ook mor in de nacht stoppen
Nijmoodse kokerij – Grunneger joar van de Smoak volgens El Bulli
Ook de dege degelke Grunneger streekkeuken kin op t heden ja nait achterblieven in d’ontwikkelns van t moleculair koken. Wat is der aiglieks meugelk in t experiment van t omzetten van oerdegelke resepturen noar n nije jaze dij ook paast in tied doar wie nou in leven.
Omreden dat n Grunneger van oldsheer aaltied Nummer AAIN is en van noature veuraan staait veur t nije, evoluaaiert ons eten speulenderwies mit nije opvattens, dij onnertied noa t bezuik van Sunterkloas uut t ieskolde Spaanje noar ons kontraainen overwaaid is.
De weerslag van dij El Bulli hype het t volgende krejatieve menu opleverd. Wie stellen joe bie wieze van spreken de kombinoatsie Grunneger Mollebonen mit haalfdreuge Grunneger metworst veur, dij in de stiel van dizze grode chef uut Barcelona moleculair omteuverd wuir tot n goud berapboare pozzie.
Ie goan allereerst noar de groothandels en kopen doar twij spoitbuzzen van t bekìnde maark Gruno, d’aine is vuld mit dreugemetworstschoem* en d‘aander mit Grunnegs gruine snietjemousschoem**.
Ie goan dus as volgt aan loop: Waik de mollebonen eerst veur en dou t din in d’oven op pofstaand. As dit gepof gebeurd is, doun je t in blender en moalen t zo fien meugelk. Ie doun t nou in stikstof en vörmen t mit vaailege handsen der bie aan, tot n minigasuniegebaauw. Ie nemen nou n mooie museoale porselaainen bord tou diggelkaaste oet en ploatsen t mollebonengasuniegebaauw persies in t midden. Rondomrond spoiten je zo sekuur meugelk in model, vief martinitorentjes van dreugemetworstschoem. Ie plaaistern dat Grunnegs gruin of mit gruine snietjemousschoem. As t aalmoal goud in model is, zetten je schuddel veur n dik uur vot in d’ieskaaste.
Hiernoa hoal je t bord tou d’ieskaaste oet en plakken din onder t bord n chip dij t Grunnegs Volkslaid zingt. Leg nou rondom t bord aspieken baaltjes, dij moakt binnen van Raspetatpoeder mit uutlopen metworstvet. Loat der din, mit hulp van n op toavel baauwde ventilator nog wat Grunneger mosterdpoeder deur de lucht dwarreln. Dain t as ófronden op mit n glèn hait lepeltje.
Geef der as goie begelaaider ook nog n reageerbuiske mit Fladderak bie.
Eetze in de Beetse.
Groothandels : *Honas **Grosli
Dit drijkeuningenlaid is om en bie 1650 as vlaigend bloadje deur de wereld goan Wie kregen t al weer n tied leden toustuurd deur Henk Scholte en hai haar der gain bezwoar tegen dat we t in Kreuze ploatsen gingen. Aiglieks haar dat al in de veurege õflevern wezen mouten, mor dat is ons even ontkommen.
In n stroombraifke schreef Henkt t volgende derover :
“k Heb t noa veul speurwaark vonden in de Koninklijke biebeltaik in n Hoag. Dik datteg joar leden har k der over lezen in t tiedschrift Groningen joargang 1916. Domie Wumkes nuimde dit laid in n artikel over t oldste Grunnegers. Hai har doarbie ook dails n fragmint van Starre Gesangh opnomen. Omreden dat ik al joaren mit Grunneger meziek aan loop bin, wol k dizze singeliere tekst mit Törf uutvoeren. Ik kwam loater in t bouk van Jan Ter Gouw “De Volksvermaken” n volledige versie tegen.
Dat wuir uutgangspunt veur Törf en noa onnerzuik noar “hier treden wi Heere met onse Steere” haren we ook meziek derbie. T Orgineel har k dou nog nait zain. Goud nou is dat ook boven woater. Magst hom as vanzulf wel bruken veur dien Kreuze.