Schippers, Wilm

Tiedens n oavendwandeln kom k op wat onbekender terraain. Tenminsten, k bin dij kaante de leste tied nait veul op west. En tot mien verboazen is der n nije winkel, vlak bie n De Boer en man, bliekboar van boetenlandse ofkomst, verkocht “buitenlandse levensmiddelen”.

k Vroag of k even rond kieken mag.
Huil vrundelek: “Ja, hoor en als er vragen zijn dan hoor ik het wel.” t Is of k miezulf heur in mien aigen nering.
k Struun wat rond, groot is t nait, t vrumde spul zit maist in blik, mor swaarde olieven lieken mie wel wat en k vraog hom n bakkie vol.

“De eerste keer meneer?”
“Ja.”
“Dan moet u eerst eentje proeven.”
En hai gef mie aine en snoept, zo asse zegt, ook aine met. Ze binnen lekker, dus koop gaait deur.

Terwiel hai inpakt vroag k hou laank of e der al zit. Drij weke dus. k Stel dat eerste aanloop altied stoer is. Nee hor, t was van begun of aan n drokte van belang west.

t Spul gaait ondertied op weegschoale, hai tikt wat in mor krig t nait veurmekoar. Mommelt wat over nog te programmeren kompjoeter en pakt rekenmesien.
“Een euro zestig.”
k Reken of, krieg der n extra puutje om en man zegt mie o zo vrundelk gedag.

In goie zoaken leuf k nait zo haard meer, mor k beloof miezulf da k der voaker langsgoa. Al was t mor om n keer vrundelek behandeld te worren.

Tiedens n oavendwandeln krieg k zin in kovvie. Op noar de best in town, noar ze zeggen. Gewoonlek goa k altied noar de kroeg der noast, mor k wil nou wat meer kraanten lezen dan t Dagblad.

Noa tien minuten, mit pien en muite de kraante bie slecht licht spelt te hebben, loop k mor noar toog om wat te bestellen, bedainen doun ze bliekboar nait. En k vroag om wat meer licht.
Huil kört: “NEE! Vanavond is en blijft gedimd.”

Kovvie is goud, kraante blift duuster, lol is der of. k Bin op tied weer thuus en beloof mie da k elke oavend dij k vrij bin zo tegen aachte bie best in town even binnen loop en eerst vroag of de leestoafel wat meer licht kriegen kin en doarnoa wat bestel.

Sinds k hier woon goa k hier ook noar kapper.
Salon zit tegenover Bakker Bart op eerste verdaipen.
k Bin n man van waineg woorden. Ze vroagen mie hou ik t hemmen wil en doar holt t maist met op.

Ain keer kwam t tot n gesprek.
t Was n gloepens waarme dag en kapsters kluigen dat t ondanks pas installeerde airco hoast nait te harden was.
Noa ofloop kiek k es hou t aanlegd is, goa drekt trap terugge omhoog, neem baide dainstdounde wichter met en leg heur uut wat met airco loos is.
Õfvoer hemmen ze in hal beneden moakt woardeur ofwaarkte waarme lucht drekt weer noar salon opstig.
“Joe zetten toch ook nait deure van koelkast open om keuken kold te kriegen!”
Mie liekt dat pienterste van baide mie begrip ….
Aan doan is dr nooit wat.

Oflopen moandag mos k weer. k Goa aan wachttoavel zitten, neem tied want dr is n huile riege veur mie.
Wachttied vaalt met, bliekboar goan veul mìnsen tegenwoordeg onder begelaiden noar kapper.

t Pienterste wicht is met n nije in boan. Aiglek bin k bie nije aan beurt mor pienterste beduudt dat zij mie wil knippen.
k Goa zitten.
“Weer gedekt?”
“Joa,”
Veurege keer haar k heur ook, toun vruig ze of k van hoarcoupe veranderd was.
“Joa, k was van plan om even wat meer aan joe uut te geven.” zee k toun.

Nou moakt ze verder geen woorden aan mie voel. Ze knipt as wend, mor noa afloop kamt ze mien hoar in ploats van steil achterover wat opzied, hoalt spaigel en noa n zwierege zwaai met kapmantel knipoogt ze mie bemoudegend tou.

k Reken of, doal trabbe of en vuil inains heur hint.
As n vernijd mìns stap k kwiek winkelcentrum in.

Tuus heb n lös toetsenbord bie mien mobiel. Aine keer dut t wel, eem loater weer nait. Om gek van te worren.

Dat roeten nog in sponningen zitten is n wonder.

Op noar mien vaste leverancier. Doar helpt n nije kracht.

n Jong wicht (bliekt loater dochter van boas te weden) met n knabbe kop, mooie ogen mor veuls te dikke kont.

Vertel heur mien probleem. Ding mot met op rais, dee ze vrouger ook veul, en k wil n cursus dij op DVD stoat tiedens t veule vlaigen doun.
Verder magt t wegen noch kosten.

t Wicht sprint PC op boalie in mor k zeg:
zuik t mor eem rusteg uut as t tied hest en mail t mie mor eem deur.

Zulfde oavend heb 5 concepten met advies en heur aigen ervoaringen.

k Moak mien keus, ze gef nog n goie hint; koop wod sloten.

Wa’k nog nooit beleefd heb gebeurde dou:
Zotterdagmiddag hoal ik n miniPC, dito DVDspeuler, n moes zunder koabel en k bin binnen ketaaier aan slag.
t Oprumen van deuzen, puten en aander resterende rötzooi nam meer tied in beslag.