Ridenberg, Chris

Der was es een boertje oet Slochter
Dij gong noar de maart mit zien dochter
Ze mos an de man
Aans kwamt der nait van
n Koopman oet schanse dij kocht er

Der was es n kou in Staindam
Dij net van de bollenmaark kwam
Mor oh wat n strop
De bollen waren op
Wat muik mie dij kou n tam tam

Een eerdappelkoopman in bonus
Dij haar zo’n verschikkelk kapsones
Dat zien handel niks fris
Noar voelnis goan is
En koopman nou wait wat zien loon is

Een ongezond hondje op t Wad
Haar lest n zolherentje had
Zien lief wuir van streek
En net in dij week
Haar Lenie al jankertjes zat

n Karper van krap an n joar
Dij zwom van Termunten noar t Woar
Hai wol, zo te zeggen
Zien grenzen verleggen
Mor viske-lu vongen hom doar

Een kou oet Ol Pekel dij wol
Nog wel es een keer noar de bol
Mor dou t zowied was
Zee de bolle ‘ík pas’
Oet pekel ? … dat wordt mie te dol

n Klain krimineeltje oet t Zaand
Dij stool bie de super n kraant
Gainain dij wat zee
Loat stoan dij wat dee
Dus : Aiglieks niks an de haand

Een legere schoul zunder licht
Haar op wat verlichten gain zicht
Gemainte zee vot
En dat was slim bot
Dat spultje doar, douvve mor dicht

In Onderndam heb ik heurd
Doar is n meroakel gebeurd
Op kloarlichte dag
Alle hounder van slag
Gain hoan dij doar nou nog om treurt

n Halfmal bie ons in Tjamsweer
Dij zee an mien zwoager n keer
Ik wol ja wel geern
Met dien poedie verkeern
Hai is noú bie heur in de leer

Een kerel van stand in Vlagtwedde
Dat was toch zo’n slim eelske medde
Hai smokte zien wicht
Liek in heur gezicht
En was den volsloagen oet kedde

In Aauwerd doar wuir lest verteld
Ze haren der n kermis besteld
Mor domie dij von
Dat dat aigelks nait kon
Nou binnen ze tot tonen vergreld

Ook was der n krik in Zuudbrouk
Dij legde heur aaier in houk
De boer dij dat zag
Schoot vot in de lach
En dee het op slag in zien brouk.

Een scheuvel oet Maiden was lest
n Daggie noar Winschoten west
Mor ainmoal op glee
Was t deu en oh wee
Dat was veur dij scheuvel nait best.

Zo’n smerege jong oet Oethoezen
Zat aal bie zien moeke te soezen
Hai wol ja zo geern
Het kappersvak leren
Zulf haar e de kop vol met loezen.

Een streuper oet Jipsenboertange
Dij was veur de duvel nait baange
Bie nacht en zowat
Den gong e op pad
En juig e de hoazen op staange

In Hoogezand is der n vent
Dij staait as n halfmaal bekend
Hai steelt as n roaf
En zegt den hail broaf
Ik ben dat ja aans nait wend

Der was es n wichje in Mij
Dij was al n haile zet vrij
En wat ze ook dee
Ze kwam nait op stee
En kreeg gain verkeerntjederij

Der was es n kerel in Spiek
Dij kreeg van zien wief nooit geliek
Mor dou op n dag
Dee e toch zien beklag
Hai woont nou allain achter diek

n Pekel doar heb ik lest heurd
Is openboar orde versteurd
Doar was ain bie pad
Zunder klaier om t gat
Pliezieman het heur bekeurd

In Opende zo gait n verhoal
Doar proaten ze n aandere toal
t Is Vrais of zukswat
In elk geval plat
Veur Grunnegers ja nait normoal

Der was ais een poes in Sapmeer
Dij haar op n oavend n keer
Verschikkelk verlet om n koater
Doarom was ze n uur of wat loater
Mit n flezze vol draank in de weer

Doar gait n biezunder verhoal
Zowat tussen zeuven en acht
Den wordt der n gedichie verwacht
n Limmerick hait dat normoal

Bie Tolbert en Laik en omgeven
Doar is t knap stoer om te leven
Bie Nietap op grens
Doar is t ja Drens
Veur Grunnegers niks te beleven

Der was ais n haalfmaal oet Stad
Dij fietste van Waarfum noar t Wad
Bie Aauwerd zowat
Dou zag e pas dat
Zien stuur der verkeerd-om op zat

Dij wind in Veendam is echt woar
Het rokt der ook maistied wat roar
Mor lu dij goan soezen
Dij goan mor verhoezen
Den is dat tenminste weer kloar

Het wotter in Schanse is krachteg
Veural veur dat bad is dat prachteg
Want t volk wat der zwemt
En dat heurt misschain vremd
Is maistied ook kapitoalkrachteg

Een zoltkamper visser op t Wad
Dij was zien affeer ja knap zat
Hai vong aal mor vot
Niks aans as ‘bot’
Der was mit zien oas dugt mie wat