Oompies

As joe dit zo lezen, din kin k mie indenken da je joe oafvroagen: “Zol t Oompies in de kop sloagen wezen? Woar slagt dit nou op?” Moar as stukjesschriever mout je wel wat en din bin je aal aan t prakkezaaiern woar je t dizze keer over hebben mouten en din wil t in ainen van gain raand of kaant. Schrik slagt joe din om t haart omreden je hebben niks in de kop dat muite weerd is om aan joe te vertellen.
Moar d’ol heer zee aaltied as der wat dunderwolken veurbiedreven: “t Komt aal kloar mien jong!” Doar heb k mie zoveul meugelk aan spaigeld en k mout zeggen t het mie wel deugd doan.
Zo as verschaiden van joe waiten, is Oompies oaf en tou mit meziek op pad, nait achter meziek aan, moar mit. Din beleef je van alles, as je t moar zain willen.
Zo ook n poar week leden. Wie gingen mit n soort van bloaskapel, wie speulen haile schiere swingende deuntjes woarbie je nait op stoul zitten blieven kinnen, noar d’overkaant. Zeg moar noar ons noabers woar wie laang leden slim rebulie mit had hebben. t Ging meroakel man en elkenain haar der zin in. Moar zo as joe wel waiten is der aaltied wat te doun as der aargens meziek is. Dat was doar vanzulf net zo. Ze haren doar t zogenoamde Mousfeest. (veur t gemak heb k t moar even in t Grunnegs overzet). Wie mozzen ook miteten en doar zaggen wie vanzulf nait tegen aan. t Smuik goud en wie kregen aalmoal t liefke koegeltjerond. Ik dochde dat t hoast oaflopen was moar wie mozzen nog n moal in de boan! Moar mit zo’n lief vol eterij vaalt t nait mit om nog schier te speulen.
Minsen heurn der niks van hör, mor veur de mezikanten is t n aander verhoal. Din kin der van alles gebeuren. n Poar week leden ston ik op n concert n hail stoer stuk te speulen mit n grode bigband. In dat stoere nummer was der nog n veul stoerder stuk veur de trompetters. Veuraal d’eerste partij haar t slim stoer mit dij hoge noten. Moar dou kwam dij haile hoge noot… Aal wat der kwam, gain hoge noot van veuren oet zien trompet moar wel ain van achtern. Nait op toon, moar wel mit n luchtje der aan. Zien pazzipanten konnen nait bie hom duren en kregen n vlij op tong. Minsen in zoal hebben der nait veul van roken, meschain dat de veursten n beetje n lucht in de neus kregen. Moar t jong haar hail swoar eten dij dag, veul siepels, knoflook en kruuderijen en doar haar e slim last van. Dou ontkwam hom der ain dij der nait om loog!
Moar even weer noar t Mousfeest: Wie haren t liefke hail schier vol kregen en gingen weer noar t toneel. k Mout joe nog even vertellen, dat wie lopend meziek moaken. Kinnen dus zunder stekkers en stopcontacten.
Op dat podium was der apaart n klain verhogenkje veur de dikke en leutje trom.

Dat scheelde vanzulf wat roemte veur d’aander mezikanten. Want dij tromsloagers dij vegen der wel op lös hör! Sums binnen t net wilde Indioanen zo as bie n voetbalwedstried. Of je t leuven willen of nait lu, midden in n stuk woarin t nogal slim te keer ging en de dikketromsloager op zien fluitje bloazen mos, zo as oafsproken op repetitie, gebeurde t. Hai wer rood om de kop, dee slim zien best, moar t ging nait goud! De fluit vloog hom oet de bek, t gebit der achteraan en wie moar wachten op dij fluit dij nait kwam! Wie hebben t aalmoal nait zain moar n stuk of wat wel vanzulf en dij konnen nait wieder speulen. Ze haren de boksem nat van t lagen. Moar tromsloager, wel wat op leeftied, sprong van zien verhogenkje en haar zien apperoat in n boksemscheet weer in de bek en veurstellen ging deur. Hoeveul minsen der wat van zain hebben zol k nait waiten, moar tegenswoordeg hebben veul minsen zo’n fotoapperoat woar je, as je geluk hebben, ook mit bellen kinnen en din zetten ze dij foto of filmke (dat kin ook) op internet en kin d’haile wereld joe bekieken. As joe dij foto of filmke tegenkommen: Oompies was der bie!!!

Wie gingen mit snij weg en as t n beetje mitzat kwammen wie ook mit snij weerom en zo gebeurde t ook. Wie vertrokken zes weken leden vanoaf Eelde. Even n tussenlanding in Maastricht om doar wat pazzipanten in te loaden en om te tanken en dou ging de rais noar t waarme zuden.Wie kwammen midden in nacht aan en maiste winkels wazzen vanzulf dicht. Op Eelde haren wie aal wat onder de körk kocht, want wie haren eerder aal leergeld geven. Wie gingen votdoadelk op t balcon zitten, t was ja nog 22 groaden, en schonken ons wat in. Je waiten ja nait lu, hou lekker dat vuilt, oet dij ol snijpot in ainen in de lekkere waarmte.
Ons onderkommen was ja dik veur mekoar, das ja slim belangriek.Noa zo’n laange raais kin je maistieds wel goud sloapen en k wer tegen mirreg wakker moakt deur de vraauw mit n lekker bakje kovvie. Zai haar aal lekkere stoetjes hoald en wat beleg en zun scheen ons in de moaze. Wat n leven! Ik keek ais wat om mie tou en noar beneden en kon mien ogen nait gleuven! Wat zag k doar n mooi wiefke: van boven splinterlieke noakend mit n bos holt veur de deur van jewelste en recht veuroet. Vraauw Paay kon wel inpakken.
Vraauw was nijsgiereg woar ik wel zo’n belangstellen veur haar en keek ook even noar beneden en zee: ‘’Joa, juust” Zo muiken wie kennis mit verschaiden lu oet verschillende landen en net zoveul toalen en dialecten.
Der was n koppeltje Italioanen dij elke mörgen op heur mooie en dure fietsen aan rit gingen en om n uur of drij weerom kwammen en din dikke lol haarn bie t zwimbad. Sums gooiden ze mekoar der onverwachts in en haren din n stuk lewaai en lol. Soavends wazzen ze op tied aan zied, ze mozzen aanderdoags weer op tied aan de bak. Zo zatten ze n moal bie n drokke ijssalon en laiten zok dat goud smoaken. Heur fietsen stonnen tegen n boom en ik ston op n oafstandje te kieken noar dij fietskes mit alles derop en deraan. Mor Oompies was nait de ainege dij keek! Ik heurde opains Duuts proaten:” Schöne Maschinen sind das” Twij Duutsers zatten de versnellens van dij fietsen te bekieken en konnen der nait over oet hou mooi dat was.Ik vertraauwde t nait haildaal: Duutsers vlak bie dij mooie fietsen! Zo veurzichteg meugelk gaf ik de wielrenners n taiken en ze haren t hail snel in de goaten wat ik perbaaierde aan te geven. Ain van dij jonges gaf mie n knipoog as taiken dat e t deur haar en aander stak doem omhoog. Aan t end van d’eerste week wer k nachts wakker van wat gestommel en gestin en zag dat vraauw nait noast mie lag. k Was inainen kloar wakker en vloog tot ber oet. Vraauw runde deur t hoes hin mit n handdouk en raip:” Aan kaant, ik heb hom!” Zai vloog noar t balcon en stubde handdouk oet!
Toun ze s nachts even op pot mos, was ze biekans op n kakkerlak stoan goan .

Wie haarn ja aal wel leerd dat je dij daaiertjes nait doodtrappen mouten, want din bin je nog nait joareg. Veural dij dikken(vaaier en vief centimeter binnen ze wel) zitten vol aaier en der blift aaltied wel wat onder joen schounzolen zitten, dij kommen in koffer, koffer op zolder, aaitjes kommen oet en krieg ze din moar ais weg! Aanderdoags zag vraauw de onderburen wat jachteg hinneweer lopen mit stovver en motblik in haand en aan overkaant in stroeken leeg moaken. Wie waiten t nait zeker mor wie denken dat zai ons kakkerlak in hoes haren.!

Ik mout ook even vertellen dat de vraauw slim gruine vingers het en aaldernoast gek op biezundere planten en bloumen is. Zai haar ook aal laang goud om zok toukeken noar aal dij schiere bloumkederij. Om reden dat wie zo wat elke dag aan sjaauw gingen, wos zai vanzulf wor dij mooie bloumkes en zukswsat stonnen. Woarschouwens hielpen niks en oeteindelk haar ze n plestik puut vol mit mooie bloumkes plukt. Moar hou kwam ze nou aan n voas? Gain nood zee ze en pakde de (lege) jenevervles van BOLS en schikde de bloumkederij der hail nuver in en k mos t eerlieks tougeven: t leek hail mooi en koamer leek inainen veul gezelleger.