Nap, Etsko

Lutje Tippe en Puk zaten achter de heege en haren n olle porremenee mit n taauwgie der aan.
Ieder bod as der aine stopde gaauw vottrekken, wel het dit nait doan as kind.
Al gaauw was de oardeghaid der òf en baide keken ze mekoar aan mit n blik van, ‘en wat nou doun’.

Ze luipen noar t buurthoes om te strunen in t ol pepier hok, toun Lutje Tippe 3 rollen inpakpepier von en Puk n poar mooie deuzen.
Lutje Tippe zee, as wie in dij deuzen nou ains peerdekeudels doun en din mooi inpakken mit dit pepier en midden op stroate zetten, din liekt t net n kedootje, wedden dat ze dizze stiekum mitnemen noar hoes en doar oetpakken.
Ze zagen t aal veur zok en lagen dubbel van t lagen bie dizze gedachte.

En din hahhahaha pakken ze om oet hahahahaha en zitten der stinkende hahahaha peerdekeudels in whaaahahaha, ze rolden baide over de grond van t lagen.
Zo zegt zo doan, vaaier deuzen, peerdekeudels derin, dij lagen deur t haile dörp, en inpakt mit pepier.
t Leek net n echt kedo.

Gaauw weer noar stroate en n deuze op weg, en achter heege votkroepen.
Duurde mor even, doar kwam n auto aan. Oh jé, t was plietsie Keurs. Hai stapde oet, keek links en rechts en legde de deuze op de achterbaanke.
Nou votweden dochten baide, veur hai der inkikt en weerom komt. Moar ook lagen ze baide in n deuk van t lagen. Ze zagen t al hailemoal veur zok hou hai de deuze aaan zien vraauw gaf mit de keudels der in.
Whaaaahahahaha.

Volgende stroate, Veenweg, ook altied wel auto’s te bekinnen.
En joa, weer n auto en weer nam dij de deuze mit, links en rechts kiekend of aine t nait zag.
t Was al wat loat en Lutje Tippe en Puk kregen n beetje smacht. Torenklokke gaf ook al vief uur aan. Wie holden der mit op zeden ze, tot mörn. Dizze deuze leg ik wel in de Hoofdstroat zee Puk, k mout der toch hén.

Lutje Tippe ging lagend noar hoes, moar mos nog wel even bie Puk aan, zien jaase lag doar nog.
Kreeg vanzulf weer n stôk worst mit van de slager, Puk zien Pa, en ging vrolek noar hoes.
Doar aankommen ston zien voader lagend boetn. Lutje Tippe zee, wat bist vrolek Pa. Joa zee zien voader, ik kom net mit noaber over in zien auto van Schaanse, vonnen wie n deuze op de weg, nog hailemoal in kedoverpakken.
Heb hom op toavel zet, kin dien moeke hom openmoaken, nin benijd wat der in zit.

Oh je docht Lutje Tippe, ik wait t wel, en haar al binnenpret.
Waist wat pa, zee lutje Tippe, moust zeggen dast n kedootje veur heur mitnomen hest. Is ze wizze hail bliede mit.
Joa, zee zien voader, dat kin k wel doun, as toe die moar stil holst, oke?
Vanzulfs pa, ik zeg niks. Wil t gezichte van ons moeke wel zain. Hai kon zoch moar amper inholden van t lagen.

Zien moeke kwam thoes en Lutje Tippe ruip heul haard, moeke, pa t n kedootje veur die mitnomen, staait op toavel.
Moeke kreeg nait zo voak wat en was hail bliede, dank je wel, zee ze tegen voader, en haar troanen in ogen.
Oh, jankde ze, bin zo nijschiereg wat der in zit.

Zai pakde t oet en trok wat mit neuze, het aine stront onder de schounen, vruig ze, t roekt net zo.
In de deuze zat n kraande en dij was wel swoar. Ze huil kraante oet deuze scheurde hom open.
De peerdekeudels rolden over de toavel en Lutje Tippe meeg zok sikkom in boksem van t lagen (in gedachten zag hai vraauw van plietsie Keurs dit al doun, dij haar ook ja n deuze mitnomen).
Lutje Tippe zien moeke begon mie toch te schelden tegen voader. Dij twij kregen mie toch n roezie.

Baide gingen ze elk mit n stoens gezichte op n stoule zitten, Lutje Tippe zee, zel k dij deuze mit dien mooi kedo mor even oprumen Moeke?
Hai haar deuze en keudels nog mor net opruumd, dou Pukkie der inkwam. Gaist ook mit speulen?
Moi mien jong, zee Lutje Tippe zien voader tegen Puk, nog wat moois beleefd vandoage?
Joa, zee Puk, wie hebben n poar deuzen mit peerdekeudels mooi inpakt en op stroate zet, en der wazzen n poar idioten dij ze stiekum mitnamen, Plietsie Keurs het ook aine mitnoamen.
Whaaaahahahahah, ik zai t al veur mie as zien vraauw dij deuze openmoakt.
Lutje Tippe keek inains hail benaauwd en schudde van neee.
Voader en Moeke luipen poars aan en Lutje Tippe kreeg n schup in moaze. Goa moar noar hoes Puk, ik leg die het mörn wel oet.

Man man, was waren zien olders kwoad, moar ainmoal op berre heurde hai zien voader en moeke haardop lagen en zeggen, dij plietsie Keurs, k wol zien gezichte wel ains zain. whaaahahahahaha. En mit zeere moaze en n laag op zien gezichte ging Lutje Tippe vredeg sloapen.

Lutje Tippe gong hail voak noar zien Opoe en Opa in Scheemde.
Mit de bus of op fietse deur Midwolmerbos.

Veural Opa doar kon hai goud mit.
Soamen vissen of even gebakken vis hoalen bie de hoaven en op bankje soamen proaten.

Opoe haar Barnevelder hounder en n haile grode hoane, woar ze altied roezie mit haar.
Als Opoe aaier zuiken mos in t hok, din trok ze klompen aan van Opa en als ze in t hok was en hoane zag heur den vloog hai Opoe aan noar de klomp. Ze reerde din moord en brand en ruip aan Opa dat hai de aaier mor hoalen mos.
Opa dij dee stevels aan en ging in t hok, de hoane dee hom niks.
Lutje Tippe genoot van dit taffereel omreden hai en zien Opa wel wossen hou dit kwam, en zai lagen soamen in n deuk van t laagen as Opoe in de hounderhok gong.

De hounder gongen minder leggen en t wér tied veur nije hounder en n nije jonge hoane, zee Opoe.
Opa keek lutje Tippe aan en vroug of hai mit Opa mit gong aankom weekend om nije hounder en hoane oet te zuiken. Lutje Tippe zee, din kom ik sikkom elk weekend Opa, zai ik ze ook groder gruien.
Was dus gain probleem. Mor n halve kip mien jong en kippesoep.

Helpst Opa mit slachten? Dat wol Lutje Tippe wel, want Opa haar hom dat leert.
De week derop ging Lutje Tippe op fietse van Beerte noar Scheemde om mit Opa mit te goan.
Doar aankommen noar de boer om hounder en hoane oet te zuiken.

Mooie grode Barnevelders haar dij boer. Veur dat ze der héngongen zee Opa, most dien klompen wel aanduin he, dij stonden bie Opa en Oma.
Dus op fietse noar de boer dij vlakbie woonde en gliek noar t grode hounderhok, doar dij jonge hounder luipen. De hounder haar de boer al schaaiden van de hoanen. Tou mor zee Opa, ik goan wel op de oetkiek, as de boer der aankomt geef ik die wel n sein.
Lutje Tippe ging bie de jonge hoanen in en ruip psst, psst en dee vout omhoog mit klompe tegen de hoanen.
Aine kwam der geliek kwoad aanrunnen, en Lutje Tippe dook der boven op. Dizze wordt t Opa. Hoane in de zak dij hai mitnoamen haar.
Opa laagde en haar nou al lol, wat bist ook n bliksemse jong.

Opa vong zien hounder en dee dij ook in n zak en ze gongen soamen noar de boer te ofreken.
Boer zee tegen Lutje Tippe, hest n mooie hoane oetzögt veur dien Opoe mien jong? Joa meneer zee lutje Tippe, dizze paast wel bie heur.

Terogge noar hoes zee Opa laagent, waist wast nou doun most he, Opa gaait der in de weke wel mit deur. Volgende weekenden wel kommen hur. Tuurliek Opa, zee lutje Tippe.
De hounder wuirden lösloaten in t hok en Opoe wer der bieroupen.
Man, zee ze teegn lutje Tippe, wat n mooie grode hoane is dat. Hai was super groots.
Opa bevestigde nog ais dat Lutje Tippe hom kozen haar. Nou hebben jullie wel n lekker gebakken kip verdaind, mor eerst kippesoep eten.

Man, wat kon zien Opoe dat lekker moaken. En den dij gebakken kip. Lutje Tippe zee wel tien moal tegen Opoe hou lekker hai dat vond. Opoe laagde en gaf hom nog n haalve. Vet luip hom laangs kinne.

Mörnvroug moakt Opa die op tied wakker mien jong, even van de netuur genieten soamen, en knipoogde. Joa is goud Opa knikte lutje Tippe en knipoogde trôgge.

De volgende mörn wér hai wakker moakt deur Opa, t was nog mor 5 uur. Opa haar al melk kloar stoan en brood smeerd. Kom mien jong, wie goan boeten op bankje zitten bie t houderhok. Opoe slept nog wel n zetje.
Ze gongen soamen noar t hounderhok en allend de hoane luip der nog, hounder zatten opsloten in binnenhok. Haar Opa gusteroavend al doan.
Nou klompen aan mien jong en waist wast doun most. Dat word weer laagen soamen over n poar weken.
Lutje Tippe trok de klompen aan en gong bie t goas zitten en vuierde de hoane mit brood deur t goas. Iederebod as de hoane t brood pakken wol din trok lutje Tippe t brood vot en gong mit klompe over t goas. De hoane wuir nou n tiedje kwoad en vloog tegen t goas. Opa dij laagde en zee tegen lutje Tippe, nou most hom belonen veur zien gedrag en din weer vannijs.
Noa ain half uur was de hoane zo kwoad dat Opa zee, ik dou t aankom weke wel veur die, kist t weekend weer verder. Hest n goie oetzöcht mien jong. Soamen lagen ze in n deuk.

Zo gong dit n poar weke, totdat Opa op n zoaterdagnommerdag Opoe ruip en vroug of ze even in t houderhok kieken wol.
Lutje Tippe haar brood en stak dat deur t goas en as de hoane der aankwam trok hai dit trôgge en gong mit klompe over t goas tot Opoe der aankwam.
Zai trok de klompen aan van Opa en gong in t hounderhok. Zai was der nog mor net in of de grode barnevelder hoane vloog heur al aan.
Lutje Tippe en Opa lagen in n deuk van het laagen tot troanen tou. t Was lukt, lutje Tippe keek groots noar zien Opa en dij zee mit troanen in ogen, wie goan straks even n ijsco hoalen.
Lutje Tippe nikde en Opoe? Dij reerde dat der weer zo’n kloten hoane oetzöcht was en ruip, volgende keer bie n aander boer de hoane hoalen.
Opa en lutje Tippe zeden allebaide van joa Opoe, is goud. Dit is nog joaren zo deurgoan.

Lutje Tippe was al n poar joartjes older en haar net as de andere jongens n olle brommer om mit te crossen.
Allain hai haar n olle Kaptein Mobilet, en dat ding was nait veuroet te branden.
As hai deur modder mos din bleef dat kreng stoan en ston hai midden in de modder en aal zien kammeroaden vlogen hom veurbie en laagden hom oet, hai was t hailemaol zat.

Moar ja, woar kreeg hai n aander brommer om mit te crossen.
Lutje Tippe ging ais bie de buren vroagen of dij wat wozzen.
En joa hur, overbuurjong dij altied mit motors bezig was zee tegen hom, kiek ains mien jong, ik heb hier nog n olle Henkel scooter. Dij staait hier mor wat te niksen. Neem hom moar mit, hai dut t toch nait. Zai mor dast hom aan de loop krigst, magst hom veur niks mitnemen, din bin ik hom kwiet.

Lutje Tippe het hom wel twinteg keer bedankt en nam de Henkel scooter mit.
Hai kon hom moar amper veuroet schoeven, man wat n swoar en groot ding is dit, as ik dizze aan de loop krieg den laag ik ze aalmoal oet.
Zien voader zag hom thoeskommen mit dat ding en zee, doe goist toch nait op dat monster rieden he?
Nou zee, Lutje Tippe, hai dut t nog nait, moar ik heb hom kregen Pa, kist mie helpen?
Zien voader was a-technisch en zee, ik heb gain tied mien jong.

Lutje Tippe keek sneu en docht, hou krieg ik dit ding aan de loop. Mits hai dit docht kwam buurjong thoes op motor.
Hoi ruip, was hest doar den veur moois Lutje Tippe. n Henkel scooter, kregen, mor hai dut t nait.
Zal ik der mërgen even noar kieken?
Lutje Tippe laagde en docht, as der aine is dij der verstand van het din is t de buurjong. Kist mie even helpen, zee Lutje Tippe, hai is zo swoar. Dat was gain probleem.
Kom mörnvroug mor even bie mie, meschien heb ik hom wel kloar mien jong.
Lutje Tippe gong laagent noar hoes.

Zien noaste buurman was in toene bezeg mit hege knippen en grasmaaien.
Mout ik even helpen buurman?
Zien buurman was zo sekuur dat hai noa t grasmaaien nog mit klaine schere der achteraan ging om te kieken of der gain spiertje stoan bleven was.
Magst de haarke wel even pakken en alles bie mekoar haarken.
Lutje Tippe was altied wel behulpzoam en dee dat broaf.

Buurvraauw ruip hom of hai ook pankouken hebben wol, nou, wat n vroag, Lutje Tippe luste alles wel, veural pankouken van de buurvraauw, kreeg hai loater ook nog opgerolde mit jam derop.
Buurman bedankde hom en Lutje Tippe bedaankde de buurvraauw veur de pankouken.

Geliek noar hoes en op berre, mörn n grode dag. Zien scooter hoalen.
Zien voader en moeke vonden dat hai wel overdreven vrolek was. Wat eten wie vandoage. Snert met dikke riest mien jong zee zien moeke.
Lekker zee lutje Tippe en schoof nog n moal aan. Dikke bord snert met n bord dikke riest mit geelsukker en botter. Hai kon wel rollen.
Mor gaauw op berre.
Man zee zien voader, wat hest wel, aans mout ik wel drij vaaier moal roupen dast op berre moust en nou gaaist oet diezulf, bist zaik?
Beetje liefzeere pa, komt van de snert dink ik.

Soavends om 10 uur wer hai wakker mit n roar geveul in zien lief. Hoi runde noar beneden om bie t huzie te kommen mor haar pech, zien voader zat erop. Hai bonkde op de deure en ruip, pa ik mout neudeg schieten, dou t sikkom in de boksom.
Zien voader ruip as geintje, din gaaist moar op de waskedel zitten en laagde.
Lutje Tippe keek om zich hén en zag de kedel, hai kon t nait meer opholden en ging der op zitten te schieten. Man, wat n opluchten, moar wat n stank. Nou ja docht hai, mien voader zit op t huzie, dij krigt toch de schuld dat t zo stinkt. Hai pakde n olle kraante en muik zien moase schoon. Zal der ook nog n kraante opleggen docht Lutje Tippe.

Hai gong weer op berre en sloapen.
Zien moeke docht loater op de oavend, mout voel goudje moar even in de waskedel doun en in de waike zetten, scheelt mie mörn weer. Zai kwam in schure en ruip, voader wat stinkst doe, man man, kist nait in schure weden.
Ze smeetde voele goudje derin en n poar emmers wotter in de wastobbe om zo rad meugelk oet schure te kommen, vot van de stank.

De volgende mörn was Lutje Tippe al op tied beneden om noar buurjong te goan, hailemoal nait dinkend aan de waskedel.
De buurjong ston hom al op te wachten.
En, zee Lutje Tippe, dut hai t?
Joa, dink ik wel, zee buurjong, allain kikstarter dut t nait, mouten hom mor even aansteuten veur t hoes.
Is goud, zee Lutje Tippe.

Buurjong zee, ik zet hom veur die in twijde versnellen en din steut ik die aan en as ik joa zeg din koppeling lösloaten en gas der bie en din koppeling intrekken en remmen, op de pedoale rechts. Hest dat begrepen?
Tuurliek, zee lutje Tippe, tou nou mor.
Buurjong stöt hom aan en as ze genog gang hebben, zegt hai, koppeling lösloaten en gas geven.
Lutje Tippe dut dit en de Henkel scooter begunt te lopen. Lutje Tippe geft goud gas en let de koppeling lös en vlogt mit n bloudgang veuroet.
Dat gaait mit zo’n geweld dat hai haalf van de scooter vlogt, mor let nait lös.

Remmen kon hai nait meer en hai vloog mit de scooter deur de mooie hege van de buurman over t mooie gras en mit n haarde klap tegen de veurdeure.
De veurvörke van de scooter ston in de deure en Lutje Tippe lag mit zien hazzens tegen de veurdeure, gas vol open, t gras vloog bie t achterad omhoog.
De buurjong luip der gaauw noar tou, stopde de scooter en ging der vandeur.
Net op tied, want doar kwam de buurman. De beste man had troanen in zien ogen en stommelde, och mien mooie toentje en mien mooie deure, van de week nog vaarfd.
Mits komt ook Lutje Tippe zien voader noar boeten op t lewaai òf en zugt lutje Tippe tegen de veurdeure aanliggen, boven op de scooter.
De buurman ropt allain mor, mien toentje, mien toentje, en lutje Tippe zien voader ropt, wat kin mie dien toentje schelen man, mien zeun, hou ist mit mien zeun?

Lutje Tippe is van de schrik bekommen en kropt van de scooter, mit n pienlek gezicht en lopt hai noar zien voader.
Toun dij zag dat hai niks mekaaierde gaf hai hom n beste peune in de moase van de schrik, en ruip, mok dast thoes komst.
Mits komt zien moeke om de hörn en ropt, voader, der is wat mit t wotter loos, t is hailemoal broen, kiek der even noar ast wilst, heb er even mit n vinger in west en veurzichteg pruift, beetje vrumde smoak en stinkt ook.
Kin der ook nog wel bie docht voader.

Lutje Tippe is geliek deurgoan noar boven, mor wér even loater deur zien voader noar beneden roupen.
Hest doe gusteroavend in de waskedel scheten doe daaier?
Moar pa, zee lutje Tippe, doe hest dat zulf noar mie roupen ja.
Nou, loat ook mor, zee zien voader, hest ook geliek, mor wos nait dast echt zo neudeg most en kist toch wel noagoan dat dat n geintje was?
Nee, zee Lutje Tippe, en ik wol mie nait in boksom schieten.

Zien voader mos de weken dernoa weer overuren draaien om alles te betoalen, en de scooter dij ging noar de iezerboer.
En Lutje Tippe dij kreeg van de buurvraauw kolle pankouken mit jam, want dij haar meelieden mit hom.
Bie de buurman mos hai veur straf de toene schierholden, wat hai mor aal te geern dee.
De veurdeure wér vervangen deur timmerman, en lutje Tippe zien voader het 3 weeke niks tegen hom zegt.
Most ook n pankouke mit jam pa? Vroug hai schijnheileg.
Ziem pa kreeg n kop as n rooie baite.

Vrouger haren de kinder voak n karre mit n geit derveur.
Ook lutje Tippe en Pukkie haren n karre mit n saane geit derveur.

Zai gongen doar mit racen tegen mekoar deur de stroaten.
De zeege van Pukkie gong as n speer as e veur de karre spannen wuir.
De zeege van lutje Tippe mos der nog aan wennen, ook lutje Tippe zulf mos er aan wennen.

Zai gongen op de hoofdtroate stoan en Pukkie trok mit kriet n strepe.
Ze gongen noast elkoar op karre en Pukkie zee, eine tweie, dreie en gong er as n speer vandeur.
Lutje Tippe kon doun wat hai wol mor de zeege keek scheel achterom en mekkerde allain moar.

Lutje Tippe gong van de karre en kriebelde de zeege onder de steert. Dat haar hai heurd van zien Opa.
De zeege mekkerde en scheet hom over de haand en ging er as n speer vandeur zunder lutje Tippe.
Op zien klompen ging hai der achteraan mor kon de zeege nait bieholden.
Stop ruip lutje Tippe, mor de zeege zag zien kaans schoon en vloog mit n rötgang Veenweg op.
Deur t rappeln van de lege karre luip hai nog haarder.

Hai runde vlak laangs de Kerkhofgraagte aan de verkeerde kaante van de weg.
Bakker Hesseling kwam der net aan mit zien gemotoriseerde bakfietse.
Dij man kon gain kaante op en zag de zeege mit karre recht op zog aankommen.
Op leste moment gooide hai t stuur om en ree pardoes in de graagte.
Kleppe vloog open en de stoetjes lagen aan kaante van de weg en dreven midden in de graagte.

De karre was zonken en bakker Hesseling zat der nog op, kopke nog net boven woater.
En de zeege dij stond stil en vrat van de broden dij deroet valen wazzen aan de kaante.

Lutje Tippe kon zien zeege pakken en was hailemoal boeten oadem.
Hai docht wegwezen nou veur dat bakker Hesselling mie te pakken krigt.

Hierblieven raip hai noar lutje Tippe.
Dij luip veur de zeege aan mit n stoetje zodat dizze mitging, Pukkie was naargens te bekennen.

Thoes kommen de zeege op staal en veural niks zeggen tegen zien voader.
Fietse pakken en Pukkie opzuiken.

Tegen etenstied moar weer noar hoes om te eten.
Oh jé, zien voader stond mit de bekende blik boeten en mit handen over mekoar.
Doe lamlendeling zee hai, besefst doe wel wat mie dit gaait kosten?
En weer kreeg lutje Tippe een schop in de moase.

Thoes binnen aankommen lag t haile aanrecht vol mit stoete en kadetjes.
Pa zee lutje Tippe, nou hest mie ain schop in de moase geven, moar daank zei mie en mien zeege hebben wie veur n hail weeshoes brood, en hai laagde.
Weer kreeg hai n schop in de moase, en zien voader zee, ik heb ze wel allemoal betoald klojo.

Lutje Tippe knikte en pakte n puut en stopte doar brood in.
Wat bist toe van plan hiermit? Lutje Tippe zee, veur Pukkie zien zeege, hai het van mie wonnen.

En lutje Tippe kreeg de zoveulste schop in zien moase. Zien voader luip schudkoppend vot.
En geleuf t of nait, moar weer heurde hai de lach van zien voader, moar dat kon immers nait, want dij was kwoad.