Meijer, Anno

Doar staait e
Pedde schaif op kop
In t grauwe mesjester
mit n roege kop.

Achter de wange
n sloatje tabak
Op de nekke of fietse
Ain of aander zak.

Klompen aan de vouten
s Winters stro der in
Taaw om boksempiepen
Niks is om te min.

Dat is mor de boetenkaande
Dij hom wat beter kin
En hom bekiekt van binnen
Vindt der voak wat zuvers in.

Kiek bie hom nait noar de schille
Schrik nait van zien raauwe toal
Want hai is doarbinnen
Voak van zuverste metoal

Bonzen in de kop, hoamergeklop,
Neuze potdichte, pien in t gezichte,
Pien in de strödde en killende koezen,
Zinkens in d’harsens en d’oren aan soezen.

Pien in d’aarms, krampen in daarms,
Polze aan t joagen, tonge besloagen,
Pien in de rogge, pien in de bainen,
Tonen as ies en de vouten as stainen.

Koorze as n peerd, hail dag niks weert,
Stief as n ladde n smoak arregadde,
Ogen aan t troanen en hailemoal rood,
Kop en bainen swouder as lood.

Aal mor aan t rillen, dörst nait te stillen,
Tandengeklapper, aaldoage slapper,
Kroaken en steunen van aal dij ellende,
Kennen van pien nait overenne.

Keel aal mor dikker, kold as n kikker,
Den weer aan t gluien, de huile dag bruien,
Twij veren berren, de neuze der onder,
n Kroeke of vlinde en meer zok gedonder.

Nachten en doagen in berre omruden,
Proaten mit roare haisterge geluden,
Housten en koggeln, gekroak en gepiep,
Ain stok ellende, ja dat is nou griep.

Oet overlevern