Kloosterman, Martinus

Wie waren 15 joar of doaromtrent en dikke kammeroaden. Woarom? Van mien kaant omdat ik n bult van hom kon leren. Hai zat ja net zo vol kuren as n bok vol keudels. Van zien kaant wait ik t aiglieks nait precies. Wie hemmen dat noeit zo besproken. t Ging goud zoas t ging. Doar huifde je verder gain drokte om te moaken.

k Zel joe ain veurbeeld neumen van wat ik zoal van mien kammeroad leerde.
Hai broesde op n gegeven dag op n lainde brommer deur t dörp. Nou was der ien dei tied ien haile gemainte (vief dörpen!) mor ain politieagent meer, mit as standploats t hoofddörp netuurlijk. Onder ons haitte hai: Pietje Potlood. Dai noam haar e kregen, omdat hai zich bot gewichtig veur dee (en ook vuilde, denk ik) as er es n keer wat te schrieven was ien t dörp. t Was der ja aaltied rustig. Nou ja, s zoaterdaags kreeg Kees Klokje wel es ain teveul, zodat hai dei moanen mos om zien ber op te zuiken. En ook waren d er wel es n poar knoapen dei heur appels nait bie Proem, mor aargens aans betrokken, woar ze wat gekoper waren. En t was natuurlijk ook hail bot tegen de wet as d er n ploatselijke timmerman zunder achterlicht van t waark noar hoes fietste. Mor dat waren den ook wel zowat de zwoarste vergriepen, dei der ploats vonden. Nou ik t schrief schut mie n nog zwoarder vergriep te binnen, mor dat hol je nog tegoud.

Je mouten mie nait vroagen wat zien echte noam was. Dat kin k echt nait meer bedenken, das ook gain wonner noa zeveul joar.
Mor goud, man haar t dus drok genog. Hai mos nou aale waark allain doun, wat eerder deur hom mit nog nog n stuk of vaaier collega’s doan wer. En alles mos op fiets. Zo’n fiets, tja, dei haren allain plietsies mor. Echt n rechtveerdige fiets. Mit n zuuver recht model stuur. Mit n bel, dei wel op vieftig meter ofstand duulek heurboor was. Mit n “gezondhaidszoadel”, woar allain goud getrainde plietsiemensen laanger as 2 minuten op zitten kennen. En nait te vergeten, n flink model koplaamp “Noorderlicht”, n helder rood achteroetschienend achterlichtje, woar t woord ‘Koets’ op ston, monteerd op n strak stuk wit (k leuf 30 cm.) van t achterspatbord. Mor hai dee zien best, das zeker.

Hai zicht – en wat meer is – heurd dat jong op dai brommer deur t dörp rausen. Hai wis ja wel dat t ding nait van hom was.
Hai posteerd zich dus op t oetvogelde moment () midden op Börgweg. Mien kammeroad kon nait links of rechts en ook nait achteroet.
Hai geft dulek t stoptaiken, zoas hai dat leerd het: Halt POLITIE!! Mien kammeroad stopt, let t lawaai van ol plof wat oetroazen, zodat e Pietje Potlood zowat verstoan ken.
Plietsie: Hoe old ben je? Mien kammeroad mot zich even beroaden en vragt: Wat blief? Zogenoamd haar e t nait heurd vanwege t lawaai en kon e even wat bedenken. Hai kon ook nait mit twei woorden spreken, zoas e dat leerd haar van zien moeke. Zeg nou eerlijk, ken dat: ‘Wat zegt Potlood’? En: ‘Wat zegt u meneer de agent’ is ook onmeugelk; want den docht onze plietsieman doalijk dat e veur gek hollen wer.

Doarom: Wat(1) blief(2). Dus nog ais vragt e: ‘Hoe old ben je’? Ientied haar mien kammeroad zich bedocht op n antwoord, dei hom d er oet helpen kon. Want op t zulfde moment dat hai opains dei ver… Pietje Potlood zo mor opaains stoan zicht doar midden op stroat mit zien haand ien lucht, goan d er allerhaande visioenen van t mainst onplezaierige soort deur zien kop. En juust dat hielp hom om op t volgende antwoord te kommen en ook nog zunder te laigen: ‘k Hoop 17 te worden’! ‘Nou, rie dan maar deur’, zegt ons aigen, bovenstebeste gerechtsdainoar.
n Poester gas en weg was mien kammeroad!
Of e hiernoa nog weer zo driest deur t dörp raust het, wait ik nait zo goud meer…

Boer Hekmoa woont ien n groot wit hoes net boeten t dörp aan Hoesterweg.
Boeren en aandere minsen dij t goud doan hadden en t wat rustiger aan doun wollen, kochten doar een stukje grond en laiten doar n groder of wat klainer hoes op baauwen.
t Was mor net hou goud ze boerd haren.

Veur zien rentnaaiershoes is n sloot mit wat grachtachtege allures. Rechts is n dam mit n iesdern sierhek. Doarnoast begunt n normoale sloot dij aal braider wordt en op t én n soort viever is.
Bie weg is wal oareg hoger as aan overkaant, doar lopt t gazon langzoam van t woater omhoog. Krekt n sloot veur ons om es lekker oet te perbaaiern hou goud je bennen ien t slootje springen.

Hekmoa’s gracht, zoas wie hom nuimen, zit altied vol met salamanders, stiekelspoorns en meer van dat spul. Doarom waren wie doar voak te vienen. Wie wissen ja wel wanneer boer nait thoes was.
Hai ging aaltied nog n haile schoft noar ploats ien poller, woar zien zeuns nou op boerden.

Op zekere dag bennen wie drifteg aan t oefenen. Nico zel ons wel ais leren wat de beste techniek is om zo ver meugelk te springen. Hai zit ja ook op kweekschoul ien stad. Tied wordt nait om docht. Dus wil t geval dat boer aanrieden komt, zunner dat wie t ien de goaten hemmen. Hai stopt vot bie ons. Drij aan wegkaant en vaaier aan overkant op t körde gras van zien gazon.
Loat we welwezen, t grasveld wer der nait mooier van as doar aalvot n poar jongesklompen nait aal te zacht op deel kwamen.

Boer springt oet zien auto. Wie verstieven en votrunnen kwam nait bie ons op. Hai vragt vluikend en scheldend noar ons noam. Of beter zegd: “Van wel bist doe der ain?” Ien dij tied was der nog ontzag veur de dikke boeren. Nering ien t dörp was veur n groot dail van boeren ofhankelk. Wie vertelden boer den ook pecies wat e waiten wol.

“Zo, v…, zegt e as Omke zien noam nuimd het, den bist doe dus ain van dij bl…. streuper.” Omke, ook nait op zien achterheufd vaaln, zegt: “Joe motten nait alles leuven wat mensen zeggen, Hekmoa, heur. Dij zeggen zo veul, zai zeggen ook dat joe bie joen hoesholdster sloapen. Mor dat leuv IK nait, heur!”

Baaide ondeugden waren ien t dörp algemain bekend.
Doarmit haar e boer dus mooi te pakken en kon e zien voa ook nog boeten schot hollen.