Beukemoa, Nettie

Op n zoaterdagmörgen zol ik mit mien moeke noar Daam omreden k mos nije schounen hebben.
Noadat wie dij kocht hadden gingen wie nog even deur winkelstroat.

Bie Bulthoes kwam ik mit mien snoetje tegen etalageroet te stoan, doar zag ik mien Anneke zitten, n echte babypop mit kromme baintjes en n hail laif gezichtje, “oooohhhhh mam mag ik op mien verjoardag dij pop, ze gaait Anneke haiten ik vind heur zo laif”.
Wie zoln wel ais zain zee moeke en sloug aarm om mie tou, en wie gingen weer noar bus.

De haile dag dreumde ik van mien Anneke, ik kon mien verjoardag hoast nait oafwachten, ik keek stiekum in alle kasten om te zain of ze dr al was, mor nee ik kon heur nait vinden.

Nacht veur mien verjoardag was k aaldeur wakker, zol ik Anneke kriegen.

Veur zes uur was k al wakker, eindelijk mog ik oet bèr en kreeg ik n groot cadeau, mien Anneke, oh ik heb heur knuffeld en doan, nou kon ik mit heur speulen, ik waste heur, gaf heur drinken, klaaide heur aan en legde heur in bèr net als je mit n echt potje doun, ik was as n moeke veur heur.

As je heur op kop hieln kon ze mamma zeggen, ze had zo’n dingkje in t lief zitten. Mien bruier had n ledikantje veur heur mokt en ik kreeg kleertjes, wat was ik blied.

Ook deed ik heur wel ais in bad, en ik had n goatje in heur kruus prikt zodat t woater dr weer oetlopen kon. Ook hing ze wel ais aan waslien oet te druppen.

Noa n moand ging Anneke mit mie n laange rais moaken, ik ging noar Zeist, noar Bartimeus, n schoul dij specioal veur kinder was zoas mie, en mien Anneke mos noatuurlijk mit. Veur in auto bie mie op schoot zaten wie soamen de dingen oaf te wachten dij mie te wachten stonnen, Anneke woar ik alles mit dailde, dij ik alles vertelde, mien verdraitjes en mien bliedschop, want het was noatuurlijk nait mis om as lutje wichtje van hoes te mouten, mor mien Anneke het mie dr deur holpen.

Ik vertelde heur van dij pap mit dikke kloeten dij wie thoes nooit kregen, van dij juf dij mie straf gaf, van mien groepsgenoten en loater van mien eerste zuurtjeverkeren. Tegen Anneke kon ik grunnings proaten zai verston mie ja wel.

Dou zummervekaanzie aankwam wol ik Anneke mit noar hoes nemen, want vief week zunder heur dat kon ik nait, weer soamen op rais mor nou mit train.

Ze was bliede al mien andere poppen weer te zain.

Ik nam heur mit achterop pakjedroager van fiets, ze ging overal mit mie hen, tot ik leeftied kreeg dat je nait meer mit poppen speulen.

Anneke werd in n houk van sloapkoamer zet en oaf en tou nam ik heur ais op schoot, knuffelde heur en vertelde ik heur mien verdraitjes mor ook mien bliedschop, t wer n vrundin van mie, aan heur kon ik mien gehaimkes kwiet, en ook doar hielp zai mie deur hen.

Anneke kreeg een ere plekje in mien sloapkoamer tot dat ik ging traauwen, woar mos ik dou Anneke hen zetten, ze verdainde toch wel n schier stee.

Ik klaaide heur schier aan en zette heur op n stoul in logeerkoamer.

Oaf en tou nam ik heur ais op aarm, en kon ik heur weer van alles vertellen. Noa t verhoezen is Anneke op zolder beland, hou ik dat had heb wait ik nog nait…

Joaren loater zag ik heur dubbelneks tussen de deuzen liggen, ik verschoof deuzen wat en heurde heur mamma zeggen, dat dingkje in heur liefke deed dus ook nog. t Was net of ze tegen mie zeggen wol woarom lig ik hier in duustern op zolder, heb ik dit verdaint. Het zette mie aan t denken, mien zuster hed n wichtje dij vast wel mit mien Anneke speulen kin, zol ik heur oafstoan aan heur.

n Poar doagen loater kreeg Anneke n nij stee, mien nichtje was dr bliede mit, en hail veurzichtig want aarmke hing dr wat bie. Anneke kreeg ander klaaier aan en t wer n aander Anneke.

(Noaschrift van de redaksie: Mit dit verhoal dee Nettie mit aan de Grunneger Schriefwedstried van Loppersom.)

Op n zoaterdagmorgen zat mien man mit n kop kovvie achter kraant, inains vuil t oog hom op n hondje, n Boxer hou liekt die t, zol n wie ais goan bellen en kieken.
Nou mit kieken binnen je geliek verkocht.
Boaske kwam vot op ons oaf, wie hemmen hom vot mitnomen.

Instrukties mit over t eten, en zindelek moaken. Doar gingen wie hen, mit hondje achter in auto.
Wie hadden dr nog nait aan docht hou of dat zol goan soamen mit ons poeike Carola, nou bie open doun van schuurdeur ging t vot mis.
Joery, zo hadden we hom nuimt, dook vot op vretensbakken van t poeke oaf, dat har hai nait doun mouten, want doarnoa wer hai vot grepen deur dij kat.

Wie konnen dr vot mit noar daaienarts want hai had n beste kraap over t oog hen kregen.
Volgende dag was vraauwtje op bosschop west en har nog wat op toavel liggen, zai mos even noar tuzzie, en joa heur dou zai weer om kwam waren snoepkes dij zai kocht har, vot, puut lag even loater aargens in schuur, dij deugnait.
t Har hom zeker goud smokt want n tied loater zat hai hom nog om bek te slikken.

k Wil joe ook even vertellen hou mooi ons Joery was, hai was gestroomd broen van kleur, mit n widde borst en widde voudjes en n wit drijhoukje in nek, hai was knap van lelkeghaid, n Kwieler was het gelukkeg nait, wel as je lekker mit hom aan t ravotten waren.
En doar was hai goud in. Blavven dee e ook nait, allain aans voelniswoagen dunderdoags kwam, din wer hai maistal vreselek wild.
Noa n zedje ging hai ook op les soamen mit de boas, want dr mozzen ja ook wat gedragsregels leert worden, vanoaf dij tied kon e al nait mit elke hond overweg, en har e muite mit volgen.
Zien diploma hed e wel hoald mor nooit kregen.

Op n mooie zummerdag ging t vaauwtje mit hom aan wandel even boeten dorp.
Doar waren mooie stroekjes, woar hai mooi vlaaigen en ravotten kon.
t Vaauwtje har n mooi spultje oetdocht, as ze hom raip bukte ze heur achter de stroeken, hai vloog din mit n bloudgang op heur oaf, dat ging ja meroalels mooi.
Totdat ze mit koppen tegenkaander aanvloogn, baaide laagn ze oetgeteld in t gras, vaauwtje heur bril lag n poar meter wieder, en ze kon noar dokter goan want ze had n beste gat in kop.

n Dag of wat loater was stroatje woar Joery oaltied oetloaten wer opbroken.
Dr lag aan kaant n bult zaand nog n bult zaand en dou n bult stainen, dat har hai nait deur, hai vloog bie eerste bult omhoog, machteg was dat. Dou bie de twijde, dat ging nog mooier. Dou kwam er bie daarde aan, oef dei bult was haard, hai schrok der sikkom van.

Boaske wol hom veur mouerdag op foto zetten loaten, oavend derveur har e net n pakje roombodder opvreten. Doar in zoak wol hai nait rusteg zitten, want hai mos zo neudeg, dij roombodder mos dr weer oet.

Mit poaskedoagen har t vraauwtje n mooie poastoavel mit zo’n versierde tak, kuukenkjes en ook sukeloaden aaikes. Dij sukeloaden aaikes door goat om, dij mos zai mor aal aanvullen. Zai snapte dr aiglieks niks van, man was aan t waark, en zai wis ja zulf wel wat zai dr van kreeg.
Zun scheen dou zai hom oet lait, dat was heur geluk. Want dou zag zai zien stront gekleurd opschienen, het blonk van zilverpapietjes van dij aaikes.

Zo had dat gekke baist aal wat, leste tied wer e zaik, hai viel aal vot, is opereerd aan n tumor. Hai klunderde hailndaal weer op.
Mor t ging toch nait goud hai is nou dood, en wie missen hom nog elke dag.
Dr komt wel weer n nije mor t zal nooit gain Joery worden.

(Noaschrift van de redaksie: Mit dit verhoal dee Nettie mit aan de Grunneger Schriefwedstried van Loppersom.)