Berendsen, Niek

In twijde helfte van veurege aiw herschreef de dichter, schriever en denker Derk Sibolt Hovinga t Grunnens Laid van Geert Teis. Hai mog t nait lieden dat Stad zuks n prominìnt stee innam in de tekst. Doarom veraanderde hai t refraain in:

Mien laand is mien laand in t roem verbaand
Doar bovenoet waast zien verstaand
Mien laand is mien laand in t groot verbaand
Van stad en loug en laand

Dizze veraandern het, jammer genog veur hom, nooit echt aansloagen, dus wie zingen vandoag nog aingoal de oorspronkelke verzie van Geert Teis. Toch moutve Hovinga zien tekst nait zo mor vergeten. t Het noamelk n belaangrieke bosschop, doar wie vandoag aan n dag nog aal verlet om hebben. Want hou kinve dit refraain betaikenen*? Wis waiten wie t vanzulf nait, Hovinga is der ja nait meer, mor wie kinnen wel n poging doun.

Dij leste zin is dudelk. Hiermit wil Hovinga wereld dudelk moaken dat Grunnen meer is as allènt n schiere stad mit n raand der om tou. D’aander zinnen worden lasteger. t Dunkt mie dat Hovinga hiermit bedoult dat wie groots wezen maggen op onze streek of ons gewest, mor dat wie nooit vergeten mouten dat wie onderdail binnen van wat groters.

Dit kin n olle Vraize regio wezen, of Nederlaand, of n Germoanse femilie of Uropoa, of de wereld of zulfs nog wat hogers (Hovinga was vanzulf n groot gaistelk man). Hou of man t ook bekikt, wie binnen aaltied verbonden mit aander regionen en aander lu. Benoam noudoags, mit aal ellìnde in de wereld, is t belaangriek om ons goud te bedinken dat wie ons nait òfsloeten kinnen oet angst of bozeghaid. Wie mouten ons verstaand broeken om wieder te kieken as allènt regionoale of natsjenoale trots. Doar heurt dus bie t oetkieken veur razisme, hoat en t òfsloeten van de rest van de wereld. Regionoale trots, natsjenoale trots en Uropese trots spreken nkander ja nait tegen, want zai binnen onderdail van t zulfde gehail. Zo zuggen je mor weer dat teksten dij joaren leden schreven binnen, nog aingoal weerde hebben kinnen vandoag aan dag.

*interpreteren

Sunt 2005 broekt de VVV Groningen de slogan ‘Er Gaat Niets Boven Groningen’ om bekendhaid en imago van pervìnzie Grönnen ien de rest van Nederlaand aan te peerdjen. De slogan is bedocht deur Marketing Groningen ien opdracht van t pervinsjoal bestuur. Oet mien aigen ervoaren duur ik te zèggen dat dizze slogan oareg suksesvol west het veur de bekendhaid van Grönnen, want sikkom elkenaine kent de zin vandoag aan dag en verbindt de zin ook vot mit Grönnen (of t veur meer toeristen zörgd het wait ik nait). t Idee der aachter is schier, noamelk de dubbele betaikenis van boven. Vanzulf is Grönnen de maist noordelke pervìnzie – wiesneuzen antwoorden voak dat Schiermonnikoog hoger ligt, mor de Grönneger Rötmeraailanden liggen noordelker as t Aailaand – t betaikent vanzulf ook dat der niks mooier en beter is as Grönnen. Toch ducht mie dat de slogan ien t ìnd nait goud is veur t imago van Grönnen.

Stad Grönnen wordt voak ‘Metropool van t Noorden’ nuimd; dat wegens heur grootte, heur bedrieveghaid en heur noar boeten richte en veuroetstrevende blik. Stad Grönnen tèlt mit as eerste stad van Noord-Nederlaand, zeuvende Stad van Nederlaand en n akkedemie dij hoog ien verschaaiden liesten van besten ter wereld staait. Toch is posietsie van Grönnen nog laank nait aalderbèst. Ien Nederlaand is d’aandocht benoam fokust op t Westen, op de Raandstad. Nou ik ien de Raandstad woon, verneem ik dat doagelks. Man maint hier dat der boven Zwolle niks is en dat der veurbie Amersfoort en Dordrecht niks gebeurt. Toch het stad Grönnen n bult potensjeel. Akkedemie is bekend ien haile wereld, bevòlken van Stad is jong en reloatief riek en hebben n bult leerd, der binnen n ìnde bedrieven dij ien Grönnen zitten en der binnen aal meer geluden dat bedrieven oet de Raandstad vot willen, der is genog roemte veur oetbraaiden, d’Eemshoaven is de twijde hoaven van Nederlaand aan t worden, t Grönneger muzeom dut mit ien de kunstwereld en Grönnen is n belaangrieke stad veur festivals en opkommend muzikoal talìnt. Toch het Grönnen ain probleem: t stee doar of t ligt.

Hier ien n Hoag zit ik n uur van Amsterdam òf, n uur van Bruzzel en twijnhaalf uur van Paries mit de hoogsjarstraain. n Ritje noar Grönnen kost mie drij uur en n ketaaier en zunder abbonnemìnt ook nog ais € 62,60 veur n hìnneweerkoartke. Doardeur is de psychologische òfstaand veul groter. En t is juust dij òfstaand dat der veur zörgt dat lu gain interesse hebben ien Grönnen, dat ligt aargens bie de Deense grup. Wat ook nog mitspeult, is dat Grönnen op de koart van Nederlaand ien t oethörntje ligt.

Doarom mout der n haile nije kiek kommen op Grönnen heur topogroafische liggen. Ien dizze noudoagse tied van open grìnzen en n grodere kiek op de wereld, zol man zok ien hail Nederlaand bedenken mouten dat de wereld nait opholdt bie t wotter of bie de Duutse grup en dat Grönnen dus haildaal nait wied vot is (180 km is mòr n schietìndje) en nait aan t ìnd van de wereld ligt, mòr ien t midden tuzzen Amsterdam en rest van de wereld. Messchain mout Grönnen doarom den ook meer kontakt zuiken mit de Noord-Duutsers om heur mit de Hollaanders te verbinden en om op ains n middelpunt te worden. t Nait deurgoan van de Zuderzeelien het den ook funest west, want dat haar dij funksie van middelpunt tuzzen Amsterdam en Hambörg zekern kind.

De slogan ‘Er Gaat Niets Boven Groningen’ bevestegt juust dat olle slechte idee dat Grönnen wied vot is en aargens op n ìndpunt ligt, woardeur de psychologische òfstaand groot blift en Grönnen nog aal nait aantrekkelk wordt veur bedrieven en lu. En dit is weer zunde veur de Grönneger ekenomie. Doarom stel ik veur dat der n beter verbinden mit Amsterdam en Hambörg komt, dat verkeersinfo vanòf nou nait zègt dat der file staait op de A7 van Grönnen richten Bad Nijschaans, mòr van Grönnen richten Bremen, en ook stel ik veur dat der binnenkört n nije slogan komt vanoet Marketing Groningen, zukswat as ‘Groningen, midden in de wereld’ of ‘Groningen, dichtbij, maar toch uniek’ of ‘Groningen, the gateway to the world’.