Berend wacht nait
Berend Oosterman zit weer es achter de geroaniums. Hai het n spierzaikte, dezulfde as Johan Baarghoes. Moar Berend woont nait in n verpleeghuus. Hai wil nait de rest van zien leven in leegte wachten op t ènde. Moar wel achter dij geroaniums zitten. Most ja aalgedureg n moal kieken hou ze der bie stoan. Nait dat Berend zo gek op bloumen is, moar n poar geroaniums mouten bie hom in de vesterbaanke stoan. Doar achter zitten te kinnen, dat is wel n beetje zien gevuil veur humor.
Berend kon Johan wel. Hai het vaar moand in datzulfde verpleeghuus west. Vaar moand te laank. Noa n opnoame in t Groot Zaikenhuus mos e doar n zetje ‘reaktiveren’, wat dat ook betaiken mag. Berend is der nait achterkommen. Zie hebben niks biezunders doan, von Berend. En joaren noa tied vindt e dat nog aal. Zie waren der wel goud in om lu op te baargen, t was veur de maisten t leste stoatsion. Veur Berend zel t n tiedelek verblief wezen, moar zie wollen net zo laif dat e veur altied bleef.
Dat wol Berend nait, hai wol nog wat van zien leven moaken en n verpleeghuus was doar nait t goie stee veur. Wat hom nait aanston, was dat aander lu zien leven bepoalen deden en hai zulf moar zuneg meer in te brengen haar as lege braifies. As hai zoneudeg in vaste petronen leven mos, kon e dij zulf wel opbedenken. Nou is Berend van zukzulf gainent dij laank op bèrre liggen wil, moar uutsloapen was der ook nait bie. Om zeuven uur gingen de gerdienen lös, of e dat nou wol of nait. t Was om middag dat e kloar was om van bèrre òf te goan. En doadlek deur noar d’eetzoal veur zien waarme prak. De prak dij e n weke in t veuren al uutkaizen mos van n sedel doar noeit gain fersounleke eterij op ston. As je t den op joen bord liggen haren, verswon joe d’eetlust. Wieder beston de dag benoam uut wachten of je ook bezuik kregen. As de tied doarvoar west was, wuiren d’eerste bewoners op bèrre moakt.
As ze t redden konden lag de leste der om negen uur in. De nachtdainst begunde om haalf elven, waren de lochten al uut.
Zo gingen de zinloze doagen veurbie. O joa, den mog e nog drij moal in de weke verplicht vrijwilleg noar t aktiviteitensintrum, doar de jonges net zo aktief waren as op d’òfdailen: nait. As dat de rest van zien leven wezen mos, den huifde t van Berend haaldal nait meer. Hai wol t nait veur zien dattegste al òfschrieven. Hai bleef doar nait, hai kon zuk ja gain minder stee veurstellen. Berend ging eerst weer terugge noar d’ollu. Doar haar e t goud, moar zoas aal uutwozzen kinder wol hai oeit n moal tot t huus uut. As je liggoamelk goud gezond binnen is dat ja gewoon, moar woarom zel dat veur Berend aans wezen? Hai kon best zulfstandeg wonen en n aigen leven, n eerlieks aigen leven, laiden.
Dij meuglekhaid het Berend vonden bie Fokus. Doar het hai zien aigen leven, zien aigen woonderij en mout e zulf waiten wat e dut en wat goud veur hom is. Hai bepoalt zulf hou loat e van bèrre òf gait, hai kin tegen etenstied nog bedenken wat op toavel komt, hai kin waarken, eters of sloapers kriegen, uutgoan. Hai dut net wat e wil en hou hom t uutkomt. En as e achter de geroaniums zitten wil, binnen t zien aigen geroaniums. Hai gaait nait wachten tot e opholdt te bestoan. Doar het e ook haaldal gain tied veur! k Zel joe n aander moal es uutstukken wat dat Fokus inholdt. Meschain mot Berend joe zulf moar es vertellen over wat e beleeft. Of wat e wieder aal uut zien doeme zogt.
Bie de verhoalen Wachtkoamer en Berend wacht nait: Schaande genog is t verhoal over Johan Baarghoes woar. Vanzulf heb k zien echte noam nait bruukt, moar wieder heb k niks opbedocht. Berend Oosterman bestaait haaldal nait, moar der zit wel wat van n bestoand perzoon in. Dat bin ik.
Toun k tekstredakteur van Kreuze worden bin, ston der n stukkie over in t Dagblad. Doar ston in vermeld da’k n liggoamleke bepaarken heb. Dat was aiglieks nait neudeg (op de biegoande foto was t ja te zain), want t dut der nait tou. Wat mie aangaait wait je genog en huif ik der wieder niks over vertellen. Meschain kom je n moal wat tegen in schriefsels van mie, moar doar zel t ook bie blieven.
Bert
