Benzine of woater??

Sunt k nait meer waark, heb k t nog drokker as dou k mie nog in zwait juig. Doch scheelt mie dat n bult in knippe. Veuraal as k mit auto bie pomp stoa, vlaigen liters der in en euro’s deroet. Potterfulie is moakt van siepelleer. Troanen miggeln mie over waangen as k er in kiek. Man man wat n boudel. n Mèns duurt sikkom t woagentje nait meer broeken en t ende is der nog laank nait heer. Luip t fermikkie mor op wotter, dat kost nog sikkom niks, tot onze Overhaid der ok n melkkou in zugt…. Haren ze Johannes Wardenier oet Meppelt mor geworren loaten. Oetvinder van benzineloze motor. Dat was mie wat! Auto ’s op wotter! Wat zollen wie dij tegenswoordeg goud broeken kinnen.
Diezel, gas, eerdgas, konden we din stoan loaten, mor t Grootkaptoal von t doudestieds nait goud. Febriek in Wolvega is der nooit komen. Aandailholders in eulieboudel gunden ‘Jan mit Pet’ dat veurdail bliekboar nait. Ok Regeren wis der wel road mit. Vragt er t laifst nog poar stuver bie.
Konden we mor n windmeulen op dak van auto febrieken. Kerel nog aan tou, dat zol ja wat wezen…. Regeren vindt vervast goud. Zet ja overaal zokse ‘vervoelers’ dele. Of ze mouten dij olde oetvinden weer van ‘staal’ hoalen. Doun doar n haile bult lu plezaaier mit. Kost mor n bedie, mor din heb je wel wat! k Bin benijd, woar t op oetdraait, mor k heb er nait veul ferduutsie in.

30 juni 2008