Aigenikkeg
As n mens zoch wat seupel vuilt, pebaaiert e veureerst mit alerhaande redzoame hoesmiddels weer op glee te komen. Mocht dat nait lokken, din mout e mit t woater veur dokter. Zol e dij pillendraaier dudelk moaken kinnen wat hom scheelt? Zoak is alles zo goud meugelk oet douken te doun. As dokter nait snapt wat er mit hom loos is, kin e ja bezwoarlek wat veurschrieven goan.
Doch vaalt t bie toeren nait makkelk aal joen aksies kloar op toavel te kriegen. Paardie lu nemen oet veurzörg heur moatje din ok mor evenpies mit. Twij waiten ja meer as ain. As dokter oetendelk zien konklusies trokken het, wait e wat hom en joe te doun staait.
Dou Keuneg Doavid nait meer wis, hou e oet ellènd roaken mos, zag e gain aander oetweg as hulp zuiken bie zien hemelse Voader. In 1 Samuël 30: 6 verhoalt Samuël doarover:
“Mor Doavid mannelkte zoch in de Here, zien God.”
As Keuneg Doavid denkt dat Heer hom helpen kin, mout e geestelk hailemoal mit billen bloot. Mout aal aksies bie Hom op toavel leggen, veurdat e wat verwachten kin. Tegen God mout Keuneg Doavid krek t zölfde zeggen as e t zien hoesdokter doun zol. Din kin zien Voader hom helpen en wegwies moaken.
Mit t voutvolk is ja van t zulfde loaken n pak. As Keunegen t aal neudeg vonnen om – as ze t nait meer wizzen en mit haanden in t hoar zaten – God om road te vroagen, huiven wie ons ja nait te schoamen om, as we ais in knieperd zitten, de stap noar Hom te moaken. Mit zulfredzoamhaid komen we der wizze nait.
As we schietensbenaauwd binnen dat bepoalde zoaken ons zo seupel moaken, dat we liene dij we mit ons Schepper hebben, beschoadegen of meschain wel deursnieden kinnen, paast t ons in aal klaainhaid noar onze Grode Boas te goan.
Zo as Doavid dee, kinnen we mit ons zaiktes ok staarkte zuiken bie ons Mester. Dij het vervast n luusternd oor.