Aans as aans
Alles lopt voak aans as n mens verwacht.
Altmangs beder, mainsttied minder as docht.
Doch krigt elk mens zien part of dail.
In t grode onveurspelboare wereldtenail.
t Leven komt en t leven gaait,
t komt mit bliedschop en endegt mit verdrait.
Elks het dat in zien oards bestoan al voak beleefd,
veuraal as d’Heer wat langer tied van leven geft.
Gelok is n krummel, wat n mens nooit òf kin dwingen,
t overkomt je zomor, je huiven der nait veur zingen.
Griep t mit baaide haanden hail steveg vast
en hol t bie joe, zo laank as t onze Schepper paast.
Wees vrundelk en help t aander volk oet braand,
beleefdhaid, eerlekhaid en mitgevuil binnen gain schaand.
t Kin joen aigen leven n bult aangenoamer moaken
en t kost zowat niks, aal dizze wezenlieke zoaken.
Elks denkt zoch aaid t leven oet van a tot z,
staait der mit op en gaait der soavends mit op bèr.
Hai moakt hom doarbie somtieds veul kapsones,
mor as t er op aankomt, blif e wizze bie de les.
Dou mor gewoon, dan brekt joen lientje nait.
t Bestoan brengt vanzulfs genogt vreugde en verdrait.
Gain mens huift t nog ekstroa muilek te doun.
t Is al stoer zat, normoal te leven mit goud fersoun.
Altmangs kin t leven meroakel grilleg wezen.
Mit pieken en doalen en aal wat je in boukjes lezen.
Gelokkeg komt wat n mens vreest, nait aaltied oet
en komt t leven op eerde tot n mooi en weerdeg besloet
